Coleg Sir Gâr - Rhagarweiniol Lefel 1 Pearson BTEC mewn chwaraeon

Diploma Rhagarweiniol Lefel 1 Pearson BTEC mewn Chwaraeon

Holi

Cipolwg

Llawn Amser
1 Flwyddyn
Campws y Graig

Os oes diddordeb gennych mewn chwaraeon ac eisiau rhagflas a chyflwyniad i’w astudio, yna efallai mai dyma’r cwrs i chi.

Ewch ati i wneud cwrs a fydd yn eich cyflwyno i’r diwydiant chwaraeon, ffitrwydd, hamdden a lles.

Mae’r cwrs blwyddyn hwn wedi’i gynllunio i roi cyflwyniad i chi i’r wybodaeth a’r sgiliau sydd eu hangen i ddilyn addysg a/neu yrfa yn y diwydiant chwaraeon a hamdden actif.

Cewch y cyfle i ymgymryd â gweithgareddau ymarferol ac astudiaeth ddamcaniaethol sy’n benodol i’r pwnc, ochr yn ochr â datblygu sgiliau hanfodol megis llythrennedd, rhifedd a llythrennedd digidol. Cewch fynediad i gyfleusterau a chyfarpar o safon y diwydiant megis ein cae chwarae 4G, ein neuadd chwaraeon a’n swît ffitrwydd. Hefyd fe’ch anogir i ymgysylltu â’n hacademïau chwaraeon sy’n anelu at ddatblygu athletwyr a chwaraewyr mewn ystod o chwaraeon.

Nodweddion y Rhaglen

Mae’r meysydd astudio yn cynnwys chwaraeon ymarferol, hyfforddi, iechyd, ffordd o fyw a hyfforddi ar gyfer ffitrwydd. Hefyd byddwch yn datblygu sgiliau mewn trefnu, cynllunio dilyniant personol ac ymchwil ar lefel briodol.

Byddwch yn cael sylfaen gadarn o sgiliau trosglwyddadwy a sgiliau hanfodol yn ogystal â dealltwriaeth o amrywiol lwybrau gyrfa o fewn y diwydiant chwaraeon a hamdden actif.

Cynnwys y Rhaglen

Mae 10 uned yn ffurfio’r cwrs sy’n cynnwys:

Bod yn Drefnus
Datblygu Cynllun Dilyniant Personol
Gweithio Gydag Eraill
Ymchwilio i Bwnc
Cynorthwyo mewn gweithgaredd chwaraeon
Hyfforddi ar gyfer Ffitrwydd
Chwarae Chwaraeon
Sgiliau Hyfforddi mewn Chwaraeon
Cael Pobl i fod yn Actif
Cadw’n Actif ac Iach

Dilyniant a Chyflogaeth

Mae’r cwrs hwn yn darparu cipolwg ar y diwydiant chwaraeon a hamdden actif ac mae’n annog dysgwyr i symud ymlaen ymhellach er mwyn cyflawni eu cyrchnodau gyrfaol yn ogystal â chanolbwyntio ar y sgiliau trosglwyddadwy sylfaenol. Bydd cwblhau’r cwrs yn llwyddiannus yn caniatáu i fyfyrwyr symud ymlaen i chwaraeon Lefel 2.

Mae cyfleoedd dilyniant yn dibynnu ar gyflawniadau myfyrwyr ar Lefel 1. Disgwylir i ddysgwyr gwblhau gyda phroffil teilyngdod llawn a dangos cynnydd mewn llythrennedd a rhifedd. Mae symud ymlaen yn amodol ar gyfweliad.

Dull asesu

Caiff yr holl aseiniadau eu dyfeisio gan diwtoriaid y cwrs, a’u hasesu’n fewnol.

I ennill pas mewn uned a asesir yn fewnol, rhaid i fyfyrwyr fodloni’r holl feini prawf asesu.

Mae'r cymhwyster hwn ar gael i'w asesu drwy gyfrwng y Saesneg yn unig.

Gofynion Mynediad

Bydd angen o leiaf tri TGAU graddau A* - G arnoch, sy’n cynnwys naill ai Saesneg iaith, Cymraeg (iaith gyntaf) neu fathemateg.

Mae Saesneg a mathemateg yn rhan annatod o'r cwrs. Bydd myfyrwyr nad ydynt wedi cael y graddau C neu uwch angenrheidiol hyd yn hyn yn cael addysgu a chymorth ychwanegol i astudio ar gyfer naill ai TGAU, Cymwysterau Agored neu Sgiliau Hanfodol yn dibynnu ar raddau TGAU blaenorol.

Costau Ychwanegol

Gall costau ychwanegol ddigwydd ar gyfer gweithgareddau oddi ar y safle a chit y cwrs / yr academi. Yn ogystal â darparu eich adnoddau addysgol eich hun h.y. deunydd ysgrifennu.

Mae’n ofynnol i bob dysgwr dalu ffi gweinyddu o £25 cyn cofrestru.

Mae’n bosibl y bydd cyllid ar gael yn dibynnu ar amgylchiadau unigol