Disgrifiad o'r Rhaglen
Côd UCAS: C22
Côd Cwrs: W232
Mae’r rhaglen hon yn unigryw yng Nghymru ac yn rhoi cyfle i archwilio gwehyddu, gwau a phrosesau gorffennu cyfryngau cymysg. Ffurfia lluniadu a dylunio digidol sail ar gyfer datblygu. Mae'r dull sy'n seiliedig ar sgiliau yn rhoi gwybodaeth a sylfaen arbrofol y gall myfyrwyr ddatblygu ohonynt naill ai dull cyfrwng cymysg neu ddewis arbenigo. Sicrha’r cwricwlwm bod gan fyfyrwyr y cyfle i brofi ystod o gyfleoedd gyrfa trwy friffiau wedi’u gosod mewn amrywiaeth o gyd-destunau’r farchnad: ffabrigau ffasiwn, dyluniwr-gwneuthurwr/crefft, ategolion, tecstilau ar gyfer y tu mewn a chelf tecstilau
Mae’r cwrs yn ddeinamig, yn heriol ac yn greadigol, yn cael ei redeg gan diwtoriaid sy’n arbenigwyr cydnabyddedig yn eu maes. Ein nod yw bod ein myfyrwyr yn graddio gyda chyrff o waith rhagorol a fydd yn arwain at swyddi gwerth chweil, hunangyflogaeth neu astudiaeth academaidd uwch. Mae dosbarthiadau bach yn sicrhau mynediad digynsail i gyfarpar arbenigol a thiwtoriaid.
Mae’r cwrs yn sicrhau bod myfyrwyr yn datblygu portffolio eang sy’n arddangos eu hunaniaeth bersonol. Byddant yn dysgu sgiliau trosglwyddadwy ar gyfer cyflogadwyedd yn y diwydiannau creadigol: mae gan lawer o gyn-fyfyrwyr yrfaoedd sefydledig yn rhanbarthol, yn genedlaethol ac yn rhyngwladol. Rydym yn hyfforddi ac yn meithrin sgiliau ymarferol gyda thrylwyredd academaidd, sy’n arwain at arddangosfa broffesiynol a phortffolio o waith.
Cipolwg
Llawn Amser / Rhan Amser
3 blynedd yn llawn amser, gellir astudio yn rhan-amser
Campws Ffynnon Job
Nodweddion y Rhaglen
Mae hon yn rhaglen sydd ag adnoddau da iawn gyda chyfleusterau gweithdy sy'n cynnwys: gwyddiau llaw traddodiadol (ar gael i bob myfyriwr), gwyddiau a yrrir gan gyfrifiadur, cudynnu matiau, peiriannau gwau domestig a diwydiannol, labordy llifynnau, torri â laser, weldio â laser ac asio uwchsonig; ochr yn ochr â chyfarpar printio, addurno a phwytho safonol. Defnyddir ystod eang o feddalwedd dylunio masnachol ar lwyfannau Mac a chyfrifiadur personol. Cynigiwn hefyd lefel uchel o arbenigedd tiwtor mewn dylunio dillad wedi’u gwau a llunio cynhyrchion ar gyfer y rheiny sydd â’u bryd ar droi eu tecstilau yn gynhyrchion terfynol wedi'u gwireddu'n llawn.
Mae prosiectau yn y flwyddyn astudio gyntaf a’r ail yn rhychwantu canlyniadau dylunio mewnol, ffasiwn a chelf gymhwysol. Mae cystadleuaeth genedlaethol a rhyngwladol a briffiau prosiect byw yn rhan hanfodol o’r cwrs gan roi profiad proffesiynol ac entrepreneuraidd go iawn, yn ogystal â’r cyfle i ennill gwobrau, cyfleoedd arddangos a lleoliadau gwaith. Mae’r astudio yn y flwyddyn olaf yn gwbl annibynnol gyda sesiynau tiwtorial wythnosol, sy’n galluogi myfyrwyr i greu corff personol o waith sy'n arddangos unigoliaeth, arloesedd a dawn. Mae'r cwrs yn ymfalchïo yn y ffaith nad oes ganddo 'arddull fewnol': caiff pob myfyriwr ei drin fel unigolyn a’i annog i greu gwaith sy’n adlewyrchu ei ddiddordebau a’i ddyheadau unigryw. Mae gan fyfyrwyr fannau gwaith pwrpasol mewn stiwdio olau ac awyrog sydd â’r holl gyfarpar. Mae maint dosbarthiadau yn fach sy'n caniatáu lefel uchel o ryngweithio gyda thiwtoriaid a mynediad hawdd i adnoddau.
Anelwn at helpu myfyrwyr i gyflawni eu potensial llawn o fewn amgylchedd gwaith cefnogol, cyfeillgar, meithriniol a chreadigol.
Cyrsiau Cysylltiedig
